Desa Banjarasem

Tatabuhan gong ibu-ibu PKK lan sesolahan Puspanjali  saking Pasraman Kosala Nugraha, pinaka panyembrama parikrama pangukuhan Kelian Desa Pakraman Yehanakan. Parikarama kalaksanayang Buda Wage, tanggal 22 Agustus 2018 ring Pura Desa Yehanakan. Atur uning manggala prawartaka indik pamargi pemilihan kelian Desa Yehanakan ngawitin parikrama punika. Raris ngenjek ring unteng parikrama, Majelis Alit kecamatan Seririt ngicenin sambrama wacana taler ngukuhang Jro Nengah Wardika pinaka klian adat sane anyar, kasaksinin olih Jro Mangku Tri Kahyangan, Putu Mangku Mertayasa, S.H pinaka calon angga DPR Provinsi, Gede Ody Busana S.H lan Ketut Ngurah Arya pinaka anggota DPRD Kabupaten Buleleng, Camat Seririt, Majelis Alit Kecamatan Seririt, Manggala PHDI Kecamatan Seririt, Perbekel Banjarasem,Perbekel Kalisada, Perbekel Pangkungparuk, lan Perbekel Umanyar, Kelian Adat ring sajebag Seririt, BPD lan LPM Banjarasem, taler para krama Desa Yehanakan. Banget pangaptinnyane Kelian Desa sane anyar prasida ngalaksanayang swadharmannyane. Nenten lali, Dane taler ngicenin cindra mata majeng ring Kelian Desa sane lintang pinaka cihna rasa sukmaning manah sampun ngaturang ayah ring Desa Pakraman Yehanakan. Sausan punika parikrama kalanturang antuk panyukserahan aset desa lan awig-awig saking Kelian Desa sane lintang majeng ring Kelian Desa sane anyar. Pinaka pamuput parikrama Bapak Camat Seririt ngicenin pawarah-warah indik budaya, lan piteket nyaga palemahan majeng ring krama desa.